Raidió Rí-Rá ar FM Anois

Cad atá ar siúl?

Tá plean nua á réiteach ag Coimisiún na Meán, an eagraíocht a chinneann cé a fhaigheann ceadúnas craolta in Éirinn. Straitéis um Sheirbhísí Craolacháin (SSC) is ainm don phlean. Leagfaidh sé amach cad iad na stáisiúin raidió agus na seirbhísí teilifíse a bheidh againn sna blianta atá romhainn. Sula gcuirtear i bhfeidhm é, tá an Coimisiún ag iarraidh tuairimí an phobail. Comhairliúchán a thugtar air sin, agus tá sé oscailte duitse freisin.

Cén fáth ar cheart duit páirt a ghlacadh?

Is fúinne, an t-aos óg, cuid mhór den phlean seo, ach is beag duine óg a scríobhann chuig an gCoimisiún. Mura gcloiseann siad uainn, glacfaidh siad leis nach cuma linn. Is leor litir ghearr nó ríomhphost. Ní gá duit freagra a thabhairt ar aon cheann de na ceisteanna oifigiúla mura mbíonn leat.

Trí rud atá in easnamh sa phlean:

1. Níl stáisiún FM Gaeilge ar bith ann do dhaoine óga. Tá 57 seirbhís raidió ceadúnaithe in Éirinn ar FM. Is do dhaoine óga trí cinn acu, ach i mBéarla atá siad uile. Níl oiread is ceann amháin as an 57 ina sheirbhís Ghaeilge don aos óg, agus níl sé sin sna moltaí nua ach an oiread.
2. Deir siad gur ar líne atá muid uile. In ionad stáisiún FM, molann an plean “mol ar líne” don Ghaeilge. Ach éisteann 65% de dhaoine idir 15 agus 34 bliain d’aois leis an raidió gach lá (JNLR 2026). Bíonn an raidió ar siúl sa charr, sa chistin agus sa siopa. Ní bheidh “mol ar líne” ina stáisiún raidió.
3. Socraíodh an cheist sular iarradh ort. Rinne an Coimisiún staidéar ar stáisiún raidió Gaeilge do dhaoine óga, ar FM agus ar líne. Fuair an staidéar go bhfuil éileamh ar a leithéid. Ach níor foilsíodh an staidéar riamh, agus fágadh an stáisiún FM as an bplean ar aon nós. Is faoi na moltaí atá sa phlean atá na ceisteanna sa chomhairliúchán, agus níl stáisiún FM Gaeilge don óige ar cheann acu. Mar sin, mura scríobhann muid chucu agus mura n-iarrann muid é, ní phléifear é ar chor ar bith.