Tá an feachtas seo thart anois. Le linn mí Mheán Fómhair 2026, d'úsáid 320 agaibh an uirlis seo chun teagmháil a dhéanamh le polaiteoirí chun cothrom na féinne a éileamh don Ghaeilge agus don Ghaeltacht i gCáinaisnéis 2027.

Ar an drochuair, méadú an-bheag a bhí ann don Ghaeilge agus don Ghaeltacht i 2027. Is ionann an t-ardú ón Rialtas agus an t-ardú is lú in aon cháinaisnéis le dhá Rialtas anuas.

Fógraíodh go mbeidh €4.27 mhilliún sa bhreis in airgead reatha ag an Roinn Forbartha Tuaithe, Pobail agus Gaeltachta le caitheamh ar an nGaeilge agus ar an nGaeltacht. Ag an am céanna, fógraíodh laghdú de €5 mhilliúin ar bhuiséad caipitil na Gaeilge, na Gaeltachta agus na nOileán. Níor fógraíodh aon airgead sa bhreis do TG4 tríd an Roinn Cultúir, Cumarsáide agus Spóirt.

In 2026 fógraíodh €23m sa breis do Roinn na Gaeltachta agus €5.4m sa bhreis do TG4.

In ainneoin an spéis mhéadaitheach atá ag an bpobal sa Ghaeilge, beidh an Rialtas ag caitheamh céatadán níos lú de mhór-chiste an Stáit i 2027 (0.16%) i gcomparáid le 2026 (0.17%).

Is céim siar é seo, ní hé an dul chun cinn a theastaíonn ó phobail Ghaeltachta agus Ghaeilge.

Tá obair mhór fós le déanamh. Leanfaimid orainn ag éileamh cothrom na féinne don Ghaeilge agus don Ghaeltacht.

Coinnígí súil amach don chéad ghníomh eile againn ar Gníomh.ie!

See in English

Cáinaisnéis 2027

Ó bunaíodh an Stát, níor léiríodh uaillmhian a dhóthain maidir le caiteachas don Ghaeilge ná don Ghaeltacht agus níos mó ná 100 bliain ar aghaidh níl an teanga fós mar thosaíocht cheart.

Is é 0.11% mór-iomlán an Státchiste a chaitear ar scéimeanna Gaeilge agus Gaeltachta a thagann faoi Roinn na Gaeltachta. Cuimsíonn sé sin an t-airgead go léir do Roinn na Gaeltachta, Údarás na Gaeltachta agus Foras na Gaeilge. Tá cúrsaí ó thuaidh níos measa fós, agus an bunlíne maoinithe ag 0.024% den Státchiste úd.

Tá Lá na Cáinaisnéise 2027 ag teannadh linn ó dheas, agus tá cothrom na Féinne tuillte againn dár dteanga faoi dheireadh thiar. Tá do chuid cabhrach ag teastáilt le cur ina luí ar an Rialtas go bhfuil maoiniú cothrom, cuí agus ceart curtha ar fáil don phobal don Ghaeilge agus don Ghaeltacht.

Líon isteach do shonraí thíos agus seolfar ríomhphost ar do shon go dtí do Theachtaí Dála áitiúla atá i bpáirtithe an Rialtais, Fianna Fáil is Fine Gael. Rachaidh cóip chomh maith go dtí: an tAire Airgeadais Simon Harris, an tAire Caiteachais Phoiblí Jack Chambers, an tAire Gaeltachta Dara Calleary, agus an tAire Cultúir agus Cumarsáide Patrick O’Donovan.

D'ainm:

Do sheoladh ríomhphoist:

Más maith leat, roghnaigh canúint don ríomhphost:

Roghnaigh do dháilcheantar:

Téacs an ríomhphoist:

A TD, a chara,

Táim ag scríobh chugat ós tusa mo Theachta Dála áitiúil agus ós rud é go bhfuil tú i bpáirtí atá sa Rialtas faoi láthair, chun iarraidh ort tionchar a imirt ar na hAirí cuí ar mo shon lena chinntiú go mbeidh méadú suntasach curtha ar fáil don Ghaeilge agus don Ghaeltacht i gCáinaisnéis 2027.

Tuigim gur chuir an Rialtas méadú suntasach breise ar fáil don Ghaeilge agus don Ghaeltacht i gCáinaisnéis 2026. Chabhraigh an t-ardú seo le roinnt bearnaí i maoiniú eagraíochtaí Gaeilge agus Gaeltachta a líonadh agus chumasaigh sé roinnt oibre breise a chuirfidh le húsáid na Gaeilge. Is maith an tacaíocht bhreise sin.

Ach, mar a dúirt an Rialtas ag an am, ní raibh ansin ach an tús.

Ní chaitear ach thart ar 0.17% de chaiteachas an Stáit ar Roinn na Gaeltachta agus ar TG4 le chéile. I mo thuairim, léiríonn sé seo bonnleibhéal maoinithe i bhfad ró-íseal. Tá cúpla príomhphointe thíos a léiríonn na fadhbanna a bhaineann leis an mbonnleibhéal íseal reatha:

Fiche bliain ó shin, bhí an Chomhairle Ealaíon ag fáil 2.5 oiread an mhaoinithe a bhí á fháil ag Foras na Gaeilge. In 2026, tá an Chomhairle Ealaíon ag fáil seacht n-oiread an mhaoinithe a fhaigheann Foras na Gaeilge.
In 2008, bhí buiséad caipitil de €25.5 milliún ag Údarás na Gaeltachta. In 2026, tá buiséad caipitil de €16.2 milliún (36% níos lú) ag Údarás na Gaeltachta.
Faigheann S4C sa Bhreatain Bheag breis agus €100 milliún sa bhliain. Cé go bhfuil an ról céanna ag TG4, ní fhaigheann an stáisiún ach €65.5 milliún.

An féidir leat, le do thoil, ar mo shon agus ar son chur chun cinn na Gaeilge inár nDáilcheantar, labhairt go díreach leis an Aire Forbartha Tuaithe, Pobail agus Gaeltachta, Dara Calleary, leis an Aire Caiteachais Phoiblí, Jack Chambers, agus leis an Tánaiste agus leis an Aire Airgeadais, Simon Harris, agus iarraidh orthu €57.7 milliún breise a chur ar fáil do Roinn na Gaeltachta agus do TG4 in 2027, mar atá molta ag eagraíochtaí Gaeilge agus Gaeltachta agus de réir mholtaí an Phlean Fáis, ar chomhaontaigh breis agus 130 grúpa Gaeilge agus Gaeltachta leis?

Tá miondealú ar an maoiniú breise atá á lorg ar fáil ag an nasc seo: www.cnag.ie/seas26

Ba bhreá liom aiseolas uait chomh maith faoin toradh a bheidh ar do chuid cainteanna leis na hAirí cuí.

Go raibh maith agat,

[d'ainm]

[do sheoladh ríomhphoist]

[do dháilcheantar]

Is mian liom uasdátaithe trí ríomhphost a fháil faoi fheachtais Ghaeilge agus Gaeltacht